مدونات mario

من المعروف ان الصحافة اتعملت لكشف الفساد ومحاربته .. والعمل على تنوير وتثقيف المجتمع والرقى به . وبكدة يبقى عندنا رأى عام صحى ومحترم - والمفروض أن القائمين على الصحف يكونوا دارسين وفاهمين يعنى أيه صحافة . وان الكلمة امانة يجب ان تؤدى بصدق وموضوعية منغير تحيز

- واتعلمنا كمان ان فى حاجة اسمها ميثاق الشرف الصحفى ( على أساس ان مهنة الصحافة مهنة شريفة لامؤاخذة يعنى ميصحش

نكتب أى خبر الا لو كنا متأكدين منه مع وجود المستندات طبعا خصوصا لو الحدث متعلق بالسمعه

- لكن اللى بيحصل الآن بصراحه مسخرة

أصبحت الصحافة مهنة من لامهنة له . يعنى كل السباكين والمقاولين والزبالين كمان اللى معاهم فلوس يقدروا بكل سهولة يعملوا جريدة

ويجمعوا شوية عواطلية من على القهوة ويبدأوا مشوار الكتابة من تحت السلم

- وبعضهم بيشترى كام صحفى رخيص من بتوع الفهلوة واللى بايعين ضميرهم لمن يدفع أكثر لآبتزار رجال الاعمال عن طريق الاعلانات يعنى بثمن الصفحة يصبح رجل الاعمال الحرامى رجل البر والتقوى - وصوره ملزوقه على كل الصفحات

- وكثير قوى بيلحسوا جذمة السلطة لينول الرضا والسماح وكل ماهو غير متاح ..

- ومنهم الصحفى الكبير قوى (سنا) الشايب العايب اللى بيقيم أى صحفية حسب طول شعرها وقصر جيبتها ولون عينيها ورسمة حواجبها . وميهمش الكفاءة ولا الدراسة .. وبعدين يتكلم على خلق الله ويجرحهم بالكدب

- ياريت كل واحد بيتكلم على الناس ويشوه سمعتهم يشوف نفسه الآول وبيته ومراته وبنته .. واللى بيته من زجاج ميحدفش الناس بالطوب

- بلدنا بتتسرق …. بتتباع …. بتتحرق

بتتنهب ….. بتتخدر ….. بتمرض وتموت

- كلنا مسئولين عنها وعن ضياعها - اعتقد ان ده أهم من الجرى وراء الفضائح والمتاجرة بأعراض الناس..