فى الحيطان والمبانى والبلكونات !!
** انك تلاقى حيطة فى شارع مفيش عليها أثر من حمض البوليك فى ركنها !!
** انك تلاقى حيطة مش محطوط عليها ..حاجة من الحاجات دى :
- صاروخ الكيمياء ..مسعد ماندليف ..مدرس الانجليزية الأول فى مصر ..مستر انجليش مِش عِفش ..عملاق الفرنسية الأوحد مسيو ماجد بلاتينى !!…إلى آخر وحوش التدريس فى القطر المصرى العزيز !!
- صورة حد تايه …مفقود من 9 سنين ..ابوس ايديكم رجّعوه !! ( طيّب ضاع ازاى ؟!!..وليه ؟؟!! )
- صورة مرشح فى انتخابات عدّى عليها 5 سنين ..ولسّه صورة مرزوعة على الحيطان وعواميد النور !!
- اعلان – شبه ثابت فى تفاصيله – مطلوب مندوبين ومندوبات بيع ..بخبرة أو بدون ..مؤهلات أو صيّع ..حراميّة أو ولاد ناس ..مرتب مجزى ( ابقى قابلنى!! ) + عموله ( يا ولاد الكدّابه!! ) + تأمين طبى وصحى ( على أساس ان احنا داقّين عصافير !! )…وبعدين شركة النصب وتلبفوناتها !!!
- شقة للايجار ..شرحة وبرحة وسرحة !!
- عبارات غرام خالدة ..احمد وبعدين قلب جواه سهم وسمسمة !!…أو ..ماجد بيحب سهام …شوشه بتحب عماد الكينج !!..إلى آخر قائمة العشّاق الملتهبة !!
- عبارت تعريف خالدة : مجدى بروسلى ..بجوار سينما الشرابية ( دى تقريبا على حيطان القاهرة كلها !!) ..الاديب عفيفى فى كتابه المعجزة ( أزمة السلطان والصولجان والبدنجان !! )
- بحبك يا منير ( محمد منير يعنى ! ) ..ابتدت تغزو حيطان وسط البلد !!
- وائل بخت ..وكريم الدش ..وبالم ترى ..والجوهرى ..ورومة ..ايمن سرنجة ..الصعيدى …غراب !!! ( دى اسماء شلّة ظريفة مخلّدة نفسها على الحيطة من شلل أشبالنا وأبنائنا وأولادنا الأعزاء.. طلبة الثانوية العامة !!!!!
** انك تلاقى حيطة سليمة ..مش مدغدغة !!
** انك تلاقى حيطة لونها نفس اللون اللى اتبنت بيه !!
** انك تلاقى حيطة عليها رسومات شيك ..أو ألوان حلوة ..أو لمسة جمالية ..زى أوربا !!!
فى مبانى و عماراتها مصر
** انك تلاقى عمارات مصر كلها متغطّية ومفيش حاجة اسمها بيت متساب بالطوب الاحمر ..والتشطيب دا على حساب الحكومة ..يعملوا حاجة ف حياتهم ..مش مُكلّفة قوى يعنى !!
** انك تلاقى عمارة مفيش على سطحها أطباق الدش التى تذكرك بافلام الخيال العلمى ..شوفوا نظام تانى ..زى أمريكا …اعتبروها زى مشروع الحكومة الالكترونية اللى مش هتشوف النور !!
** انك تلاقى مبنى فى منطقة شعبية مفيش على سطحه زبالة وخيش وصناديق وكراتين فارغة والف حاجة وحاجة ملهاش ريحة اللازمة !!
** انك ما تلاقيش على نفس السطح دة عشة لتربية الطيور – مؤقتا بس ! – عشان انفلونزا الطيور !!
** انك ما تصادفش عمارة فى مصر 15 دور وجنب منها قزم 4 ادوار ..أين التنسيق الجمالى ( رايق انا ..صح ؟! )
** انك ما تصادفش عمارة سكنية تحت منها ديسكوتيك ..أو كوفى شوب ..كما فى بعض مناطق القاهرة الراقية !!
** انك ما تصادفش عمارة ..الشقق فيها خلطبيطة ..شركات على شقق سكنية ( منتهى المسخرة والفوضى ) !!
** انك ما تصادفش عمارة لونها اصفر مترّب بستين نيلة ..وجنبها عمارة لونها بمبى ..أين التنسيق الجمالى ( انت تانى ؟!!!)
** انك ماتلاقيش برج فاخر تحت منّه جراج أفخر وسكانه قالبين وشّهم على طول فى الرايحة والجايّة علامة الأهمية والبرستيج ..وبعد الفيلم دا كلّه ..جنب البرج كوم زبالة قااااااااااااااااد كده يسد عين الشمس ( ياى سوفاج !!) !!
** انك ما تصادفش عمارة آيلة للسقوط والسكان لسّه عايشين فيها .. عشان المحافظة عاملة عبيطة ومطنّشة !!
فى البلكونات
** فى الافلام الامريكية ..عمرى ما شفت بلكونة ليها منشر للغسيل ..هى الناس دى ما بيغسلوش زيّنا؟؟ !!
** مناشر مصر كتالوج رائع لكل مواطن معدّى تحت البلكونة ..عن عدد أفراد الأسرة ..وأخلاقياتها ..لو مُتحفّظة ..حتلاقى ملاية السرير قدّام عشان تخبّى كل حاجة ورا منّها ..لو عيلة مش ف دماغها ..حتلاقى الغسيل كله بزرميط !!
** انك تلاقى بلكونة فيها زرْعة لبلاب ( ياااااااه ..لسّه فيه مصرى بيحب الزرع وعنده احساس بالجمال ؟!)
** انك تلاقى بلكونة مرسوم على الحيطة بتاعتها منظر جمالى ( لسّه الدنيا بخير !! ) !!
** انك تلاقى راجل ومراته بيشربوا الشاى وقت المغربية فى البلكونة ( انتحر المشهد دة ..مش موجود !! ) !!
** انك تلاقى مراهق بيشاغل بنت الجيران ( شغل ساكن قصادى وبحبه )..( يااااااااااه ..دنت قديم قوى ..من ايام الجنيه الجبس !! ) !!
** انك تلاقى طفل ماسك طيّارة ورق وبيطيّرها من بلكونة بيتهم باستمتاع ( مش باقولك قديم موووووووووووت !! )
** انك ما تلاقيش كل واحد فى نفس العمارة ملوّن بلكونته وشبابيك بيته بلون مختلف اختلاف جذرى عن جاره ..( ايه ..بيتى ونا حر فيه ..ونت مال أ…!!) !!
** انك ما تلاقيش واحدة طلعت فى البلكونة ..وطوب الأرض بص عليها ( مهما كانت لابسة !!) !!
** انك ما تلاقيش مواطن بيطلع البلكونة بالفانلة الداخلية !!
** انك تلاقى بيت فى مصر حاليا …ليه بلكونة اصلا !!!
!!!!!!!!!!!!!!!!!!!
!!!!!!!!!!!!!!!!!!!
!!!!!!!!!!!!!!!!!!!
موضوع: مدونات mario 
الخميس نوفمبر 12, 2009 6:30 am