مدونات mario

أخيراااا وجدوا حل جذرى للزباله والخبر الأحلى من كده أن الحل مش أى كلام

لالالالا..

ده حل مفيد
مستعجلين قوى تعرفوا؟
حاضر .. حاضر
تحويل الزباله لمواد عضويه لتسميد الأرض الزراعيه.
أظن أن الحكومه كده عداها العيب وأزززح
أزاى؟
هأقولكم أزاى
بس خلوا بالكم من اللى هأقوله
أستيراد ديدان من أستراليا!!!!
أيه القرف ده..معقول؟
قرف ؟
أنتم مش مصدقنى؟
طب والله حصل
الديدان الأجنبيه بتعيش على القمامه ومن أخراجها هايسمدوا الأرض..وده معروف علميا
لكن
اللى أستوقفنى أن حتى الديداااان هانستوردها!!!
طب هو أحنا حيلتنا ألا الأثار والزواج التيوانى من بنات قاصرات والحشرات والفيران والديدان..
وبكره الصين تغرق السوق بديدان صينى أرخص من الأسترالى
قعدت أتخيل..أتخيل تخيل ساخر كعادتى

يا ترى هايستلموا الشحنه دوده دوده ولا بالكونتينر على بعضه؟
طب هالاقى فى بطن الدوده ختم الدوله المصدره وبلد المنشأ ولا هايصدرولنا برضه دوده مضروبه ومشبعه بأشعاعات مسرطنه زى القمح؟
وبعدين فرق كبير بين زبالة الأجانب وزبالتنا..
الدوده هايجيلها تخمه وأساسا هاتقرف تاكل..يعنى ممكن نلاقيها بتاكل وماسكه مراخينها من الريحه وبالأيد التانيه كيس نايلون ترجع فيه اللى كلته!!!
لالالالالا
الموضوع مدروس يا جماعه..أنعقدت لجنه من نخبة علماء الزراعه لدراسة وفحص الديدان الأجنبيه وقرروا قرار غاية فى الحكمه.
أستيراد شوية ديدان صغيرين
(شوية كده فى كيس نايلون) لعمل أبحاث عليها لمعرفة طبيعتها وهل مطابقه لنفس المواصفات الدوديه اللى عندنا؟
وأتضح أن الدوده اللى صنع فى مصر مطابقه لكن مش بالكميه اللى تحتاجها قمامة الشعب المصرى
برررضه؟!!!
يعنى حتى الديدان ماعندناش أكتفاء ذاتى ليها زى القمح والسكر وغيره وغيره
طب يا ترى الديدان الصينى هاتكون أزاى؟
أكيد عنيها ضيقه وشعرها ناعم ويومين وهاتبوظ برضه زى باقى المنتجات الصينى..

ولا هايتم الأتفاق مع الصين على أنتاج ديدان بمواصفات أستراليه وأغلى من اللى فى السوق زى ما عمل حسام أبوالفتوح فى أستيراد الأسبرانزا بمواصفات التوكيل اللى كان معاه علشان ينتقم من اللى ما يتسموا اللى لطشوا التوكيل وخده عز العرب على طبق من دهب.

ولا الصين هاتبتكر ديدان تغرق السوق زى فوانيس رمضان كده..وممكن برضه تحسن فيها وتخليها تترقص وهى بتاكل الزباله وتغنى أغنية:
أحب ألم الزباله قوى - وأموت فى لم الزباله قوى

حتى الديدان أصبح ليها سعر فى السوق؟!!!
بكره نلاقى ناس بتنقب عن الديدان زى الأثار كده..ماهو أى طريقه المصرى يلاقى بيها لقمة عيش هايجرى وراها..ونقوم على ديدان بتجرى وتستخبى مننا قبل ما نمسكها.

يعنى ممكن يضاف فى خانة الهوايات فى السيره الذاتيه
زى السباحه وجمع الطوابع..
جمع الديدان!!!
يا جماااااعه اللى عنده شوية ديدان يشيلهم
بكره سعرها يغلى ونندم أننا رميناها.
أنا عن نفسى بفكر أربى شوية بدل القطط اللى مالهاش سعر دى.
ياحبيبتى يا دوده.